ຊຸດຝຶກອົບຮົມຄວາມຮູ້ພື້ນຖານດ້ານການເມືອງ-ການປົກຄອງ ແລະ ການສ້າງບ້ານພັດທະນາ ຢູ່ບ້ານໂພນສີ ເມືອງໄຊຈໍາພອນ

ລາຍລະອຽດ

ສ້າງຂື້ນເມື່ອ ວັນອັງຄານ, 03 ຕຸລາ 2023 02:27

ຂຽນໂດຍ ນາງ ນິກອນ ໄມຂະມຸວົງ

      ໃນຕອນເຊົ້າຂອງວັນທີ 25 ກັນຍາ 2023 ໄດ້ເປີດຊຸດອົບຮົມຄວາມຮູ້ພື້ນຖານດ້ານເມືອງ-ການປົກຄອງ ແລະ ການສ້າງບ້ານພັດທະນາ ຢູ່ບ້ານໂພນສີ ເມືອງໄຊຈໍາພອນ ແຂວງບໍລິຄໍາໄຊ ຂຶ້ນ; ພາຍໃຕ້ການເປັນປະທານ ຂອງສະຫາຍ ອຸດົມ ໄຊຍວນຕາ ຮອງເລຂາພັກເມືອງ, ຮອງເຈົ້າເມືອງ ຜູ້ຊີ້ນໍາວຽກງານການເມືອງ-ແນວຄິດ, ດ້ວຍການເຂົ້າຮ່ວມຂອງ ສະຫາຍ ນາງ ສຸດສະດາ ໂສພາ ເລຂາໜ່ວຍພັກ, ຮອງຫົວໜ້າຄະນະໂຄສະນາອົບຮົມແຂວງ; ມີເລຂາພັກບ້ານ, ຮອງເລຂາໜ່ວຍພັກ, ສະມາຊິກພັກ, ນາຍບ້ານ, ຮອງນາຍບ້ານ, ຫົວໜ້າໜ່ວຍງານຂັ້ນບ້ານ, ປະທານແນວໂຮມ, ສະຫະພັນນັກຮົບເກົ່າ, ຫົວໜ້າອົງການຈັດຕັ້ງມະຫາຊົນ ແລະ ປະຊາຊົນຫຼັກແຫຼ່ງຂອງບ້ານ ຈໍານວນ 05 ບ້ານເຂົ້າຮ່ວມຄື: ບ້ານໂພນສີ, ບ້ານໂພນງາມ, ບ້ານນໍ້າສັກ, ບ້ານສົບຄີ ແລະ ບ້ານພຽງດີ.

    ຈຸດປະສົງໃນການຝຶກອົບຮົມ ແມ່ນເພື່ອເຮັດໃຫ້ ສະມາຊິກພັກ, ພະນັກງານ ແລະ ປະຊາຊົນຢູ່ຮາກຖານບ້ານ ມີຄວາມຮັບຮູ້-ເຂົ້າໃຈ ກ່ຽວກັບຄວາມຮູ້ພື້ນຖານດ້ານການເມືອງ-ການປົກຄອງ ແລະ ການສ້າງບ້ານພັດທະນາ, ເສີມຂະຫຍາຍມູນເຊື້ອຂອງຊາດ, ຍົກສູງຄວາມສາມາດນໍາພາຂອງໜ່ວຍພັກບ້ານ, ການສ້າງບ້ານເປັນຫົວໜ່ວຍພັດທະນາ ແລະ ການແກ້ໄຂຄວາມທຸກຍາກ; ຮັບຮູ້ເຂົ້າໃຈຕໍ່ແນວທາງນະໂຍບາຍຂອງພັກຢ່າງຖືກຕ້ອງ, ເຮັດໃຫ້ອົງການປົກຄອງບ້ານມີຄວາມເຂັ້ມແຂງ, ໜັກແໜ້ນ ສາມາດນໍາພາແກ້ໄຂຄວາມທຸກຍາກຂອງປະຊາຊົນ ໃຫ້ບັນລຸຕາມຄາດໝາຍທີ່ພັກເຮົາວາງອອກ.

     ຝຶກອົບຮົມໃນຄັ້ງນີ້ ໄດ້ຮັບຟັງການເຜີຍແຜ່-ເຊື່ອມຊຶມ ເອກະສານທີ່ສໍາຄັນ ຈໍານວນ 05 ບົດຄື:
     - ບົດທີ 1: ຊາດລາວ, ຄົນລາວ ແລະ ມູນເຊື້ອອັນສະຫງ່າລາສີ ຂອງປະຊາຊົນລາວ.
    - ບົດທີ 2: ລະບົບການເມືອງ ແລະ ການປົກຄອງ ຢູ່ ສປປ ລາວ.
    - ບົດທີ 3: ຍົກສູງຄວາມສາມາດນໍາພາຂອງໜ່ວຍພັກບ້ານ,ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ.
    - ບົດທີ 4: ການສ້າງບ້ານພັດທະນາ.
    - ບົດທີ 5: ການແກ້ໄຂຄວາມທຸກຍາກ ດ້ວຍການຜະລິດເປັນສິນຄ້າ.

ລົງຕິດຕາມ, ຊຸກຍູ້ວຽກງານໂຄສະນາ ຢູ່ເມືອງທ່າພະບາດ

ລາຍລະອຽດ

ສ້າງຂື້ນເມື່ອ ວັນພຸດ, 20 ກັນຍາ 2023 02:51

ຂຽນໂດຍ ນາງ ນິກອນ ໄມຂະມຸວົງ

      ໃນວັນທີ 19 ກັນຍາ 2023 ຄະນະໂຄສະນາອົບຮົມແຂວງ ນໍາພາໂດຍ ທ່ານ ຄໍາໃສ ຄໍາພູບານ, ຮອງຫົວໜ້າຄະນະໂຄສະນາອົບຮົມແຂວງ ພ້ອມດ້ວຍຄະນະ ໄດ້ລົງເຄື່ອນໄຫວຕິດຕາມ, ຊຸກຍູ້ວຽກງານຮາກຖານຕາມສາຍຕັ້ງ ຢູ່ເມືອງທ່າພະບາດ; ໃນໂອກາດດັ່ງກ່າວ ໄດ້ເຂົ້າພົບການນໍາຂອງເມືອງ, ໃຫ້ກຽດຕ້ອນຮັບໂດຍ ທ່ານ ສົມສົດ ແສງອາພອນ ກໍາມະການພັກແຂວງ, ເລຂາພັກເມືອງ ເຈົ້າເມືອງທ່າພະບາດ ເພື່ອແຈ້ງຈຸດປະສົງໃນການລົງມາເຮັດວຽກສາຍຕັ້ງ, ກະຕຸກຊຸກຍູ້, ຕິດຕາມວຽກງານໂຄສະນາອົບຮົມເມືອງ ໃນການຈັດຕັ້ງປະຕິບັດວຽກງານ ປະຈໍາປີ 2023, ແລກປ່ຽນບົດຮຽນໃນການເຄື່ອນໄຫວວຽກງານຂອງ ຄະນະໂຄສະນາອົບຮົມແຂວງ ແລະ ຄະນະໂຄສະນາອົບຮົມເມືອງ, ພ້ອມທັງຝຶກອົບຮົມໃຫ້ຄະນະຮັບຜິດຊອບວຽກງານການເມືອງ-ແນວຄິດ ແລະ ຕິດຕາມ, ເກັບກໍາສະພາບແນວຄິດ-ຫາງສຽງສັງຄົມ. ເຊິ່ງສະຫາຍເລຂາພັກເມືອງ-ເຈົ້າເມືອງທ່າພະບາດ ໄດ້ມີຄໍາເຫັນຕໍ່ການເຄື່ອນໄຫວວຽກງານຂອງຄະນະໂຄສະນາອົບຮົມເມືອງ ໂດຍພາຍໃຕ້ການນໍາພາ-ຊີ້ນໍາ ຈາກການນໍາເມືອງຢ່າງໃກ້ຊິດ ເຫັນວ່າວຽກງານໂຄສະນາອົບຮົມຂອງເມືອງ ສາມາດເຄື່ອນໄຫວຕາມພາລະບົດບາດ-ໜ້າທີ່ ໄດ້ເປັນຢ່າງດີ.

   ຈາກນັ້ນ, ໄດ້ເຮັດວຽກຮ່ວມກັບຄະນະໂຄສະນາອົບຮົມເມືອງ ໄດ້ຮັບຟັງການລາຍງານຫຍໍ້ວຽກງານໂຄສະນາອົບຮົມຂອງເມືອງ ໃນໄລຍະໜຶ່ງປີຜ່ານມາຈາກ ທ່ານ ບຸດສະດີ ແສງມະນີວົງ ກໍາມະການພັກເມືອງ, ຫົວໜ້າຄະນະໂຄສະນາອົບຮົມເມືອງ; ກອງປະຊຸມ ໄດ້ມີຄໍາເຫັນແລກປ່ຽນບົດຮຽນເຊິ່ງກັນ ແລະ ກັນ ລະຫວ່າງຂະແໜງການຂັ້ນແຂວງ, ໜ່ວຍງານຂັ້ນເມືອງ ໃນວຽກຕ່າງໆຮ່ວມກັນຕື່ມອີກ.

ຫວຽດນາມຊ່ວຍຍົກລະດັບພະນັກງານຫລັກແຫລ່ງໂຄສະນາອົບຮົມຂອງລາວ

ລາຍລະອຽດ

ສ້າງຂື້ນເມື່ອ ວັນພຸດ, 20 ກັນຍາ 2023 02:24

ຂຽນໂດຍ ນາງ ນິກອນ ໄມຂະມຸວົງ

      ໃນວັນທີ​ 15​ ​ກັນຍາ​ 2023 ທີ່ຜ່ານມາ, ສະຖາບັນການເມືອງແຫ່ງຊາດ​ໂຮ່ຈີມິນ,​ ສສ ຫວຽດນາມ​ ໄດ້ເປີດຊຸດບໍາລຸງວຽກງານໂຄສະນາອົບຮົມໃຫ້ແກ່ພະນັກງານຫລັກແຫລ່ງ​ ຂອງ​ ສປປ​ ລາວ​ ປະຈໍາປີ​ 2023​ ​ຢ່າງເປັນທາງການ;​ ເປັນກຽດເຂົ້າຮ່ວມໂດຍ​ ສະຫາຍ​ ຮສຈ.ປອ ເຢືອງ​ຈູງອີ ຮອງຫົວໜ້າສະຖາບັນການເມືອງແຫ່ງຊາດໂຮ່ຈີມິນ,​ ມີບັນດາສະຫາຍຕາງໜ້າສະຖານທູດລາວປະຈໍາ ສສ​ ​ຫວຽດນາມ,​ ຕາງໜ້າຄະນະຈັດຕັ້ງສູນກາງພັກ,​ ຄະນະພົວພັນການຕ່າງປະເທດ,​ ແຂກຖືກເຊີນ,​ ພາກສ່ວນກ່ຽວຂ້ອງ​ພ້ອມດ້ວຍນັກຝຶກອົບຮົມເຂົ້າຮ່ວມຢ່າງພ້ອມພຽງ.

   ນັກຝຶກອົບຮົມທີ່ເຂົ້າຮ່ວມໃນຄັ້ງນີ້,​ ມີທັງໝົດ​ 15​ ສະຫາຍ,​ ຍິງ​ 4​ ສະຫາຍ,​ ຈາກ​ຄະນະໂຄສະນາອົບຮົມສູນກາງພັກ​ 2​ ສະຫາຍ,​ ຍິງ​ 1,​ ສະຖາບັນການເມືອງ-ການປົກຄອງແຫ່ງຊາດ​ 1​ ​ສະຫາຍ,​ ຄະນະໂຄສະນາອົບບັນດາແຂວງ​ 12​ ສະຫາຍ,​ ຍິງ​ 3​ ສະຫາຍ.​ ຊຶ່ງນໍາພາຄະນະໂດຍ​ ສະຫາຍ​ ອຸດອນ​ ສອນສຸລິນ​ ກໍາມະການພັກແຂວງ,​ ຫົວໜ້າຄະນະໂຄສະນາອົບຮົມແຂວງບໍລິຄໍາໄຊ.​

      ການຝຶກອົບຮົມຄັ້ງນີ້​ ຕົ້ນຕໍແມ່ນເລັ່ງໃສ່ດ້ານທິດສະດີ​ລວມມີ​ 25 ຫົວຂໍ້​ ​ຊຶ່ງນໍາສະເໜີໂດຍ​ ບັນດາສະຫາຍການນໍາ​, ຄູອາຈານ​ຈາກສໍານັກງານ-ສະຖາບັນຕ່າງໆທີ່ປ່ຽມລົ້ນໄປດ້ວຍປະສົບການຄວາມຊໍານານໃນໜ້າທີ່ວຽກງານທີ່ອຸດົມສົມບູນ; ການຝຶກອົບຮົມຄັ້ງນີ້​ ຈະໄດ້ດໍາເນີນເປັນເວລາ​ 2 ​ເດືອນ​ ຈຶ່ງຈະສໍາເລັດ.

ຊຸດອົບຮົມ ໃຫ້ມະຫາຊົນກ້າວໜ້າ ຊຸດທີ II ປີ 2023

ລາຍລະອຽດ

ສ້າງຂື້ນເມື່ອ ວັນຈັນ, 18 ກັນຍາ 2023 02:58

ຂຽນໂດຍ ນາງ ນິກອນ ໄມຂະມຸວົງ

       ໃນວັນທີ 06 ກັນຍາ 2023 ຢູ່ທີ່ຫ້ອງປະຊຸມເບີ 02 ຂອງຫ້ອງວ່າການແຂວງ ຄະນະໂຄສະນາອົບຮົມແຂວງ ໄດ້ເປີດຊຸດອົບຮົມໃຫ້ມະຫາຊົນຜູ້ກ້າວໜ້າ ທີ່ຈະຂະຫຍາຍເຂົ້າເປັນສະມາຊິກພັກປະຊາຊົນ ປະຕິວັດລາວ ຊຸດທີ II ປີ 2023 ຂຶ້ນ, ໃຫ້ກຽດເປັນປະທານ ແລະ ບັນຍາຍເອກະສານໃນຄັ້ງນີ້ໂດຍ ສະຫາຍ ນ ສຸດສະດາ ໂສພາ ເລຂາໜ່ວຍພັກ, ຮອງຫົວໜ້າຄະນະໂຄສະນາອົບຮົມແຂວງ, ມີມະຫາຊົນກ້າວໜ້າ ມາຈາກຄະນະພັກຮາກຖານ, ໜ່ວຍພັກຮາກຖານ ອ້ອມຂ້າງແຂວງ ເຂົ້າຮ່ວມທັງໝົດ 23 ສະຫາຍ, ຍິງ 15 ສະຫາຍ.

     ຈຸດປະສົງໃນການເປີດຊຸດອົບຮົມໃນຄັ້ງນີ້ ແມ່ນເພື່ອເຮັດໃຫ້ມະຫາຊົນຜູ້ກ້າວໜ້າ ທີ່ຈະຂະຫຍາຍເຂົ້າພັກເປັນສະມາຊິກພັກ ຮັບຮູ້-ເຂົ້າໃຈ ເບື້ອງຕົ້ນກ່ຽວກັບປະຫວັດ, ຄວາມເປັນມາ, ອຸດົມການ ແລະ ທາດແທ້ຂອງພັກປະຊາຊົນປະຕິວັດລາວ ເຂົ້າໃຈກ່ຽວກັບມາດຕະຖານ, ເງື່ອນໄຂຜູ້ທີ່ຈະເຂົ້າເປັນສະມາຊິກພັກ ແລະ ຜົນປະໂຫຍດທີ່ສະມາຊິກພັກໄດ້ຮັບ.

     ບົນພຶ້ນຖານຄວາມຮັບຮູ້-ເຂົ້າໃຈດັ່ງກ່າວ ເຮັດໃຫ້ມະຫາຊົນຜູ້ກ້າວໜ້າ ຕັ້ງໜ້າຝຶກຝົນຫຼໍ່ຫຼອມຕົນເອງ ໃຫ້ມີມາດຖານ, ເງື່ອນໄຂຄົບຖ້ວນ ແລະ ມີຄວາມຕື່ນຕົວສະໝັກໃຈ ເຂົ້າເປັນສະມາຊິກພັກປະຊາຊົນ ປະຕິວັດລາວ ເພື່ອເພີ່ມພະລັງແຮງໃຫ້ແກ່ພັກນັບມື້ນັບຫຼາຍຂຶ້ນ.

     ຊຸດອົບຮົມດັ່ງກ່າວ ໄດ້ຄົ້ນຄວ້າ-ເຊື່ອມຊຶມ ເອກະສານ ຈໍານວນ 13 ຄໍາຖາມ-ຄໍາຕອບ.

      ໃນຕອນທ້າຍຂອງຊຸດອົບຮົມ ຍັງໄດ້ຮັບກຽດຟັງການໂອ້ລົມຂອງ ສະຫາຍ ນ ສຸດສະດາ ໂສພາ ເລຂາໜ່ວຍພັກ, ຮອງຫົວໜ້າຄະນະໂຄສະນາອົບຮົມແຂວງ, ເຊິ່ງທ່ານໄດ້ເນັ້ນໜັກໃຫ້ ມະຫາຊົນຜູ້ກ້າວໜ້າທຸກສະຫາຍ ຈົ່ງຕັ້ງໜ້າຝຶກຝົນຫຼໍ່ຫຼອມຕົນເອງ ໃຫ້ກາຍເປັນຜູ້ທີ່ດີເດັ່ນໃນທຸກຂະບວນການຂອງວຽກງານ, ມີມາດຖານ ແລະ ເງື່ອນໄຂຄົບຖ້ວນ ເພື່ອເຂົ້າເປັນສະມາຊິກພັກປະຊາຊົນປະຕິວັດລາວ.

ຊຸດອົບຮົມໃຫ້ແກ່ຄະນະຮັບຜິດຊອບວຽກງານການເມືອງ-ແນວຄິດ ແລະ ຕິດຕາມ, ເກັບກໍາສະພາບແນວຄິດ-ຫາງສຽງສັງຄົມຢູ່ເມືອງປາກກະດິງ

ລາຍລະອຽດ

ສ້າງຂື້ນເມື່ອ ວັນພຸດ, 30 ສິງຫາ 2023 04:08

ຂຽນໂດຍ ນາງ ນິກອນ ໄມຂະມຸວົງ

          ເພື່ອສ້າງຂີດຄວາມສາມາດ ໃຫ້ຄະນະຮັບຜິດຊອບວຽກງານການເມືອງ-ແນວຄິດ ແລະ ສັງລວມ-ຫາງສຽງສັງຄົມຢູ່ຂັ້ນເມືອງ ໃຫ້ມີຄວາມໜັກແໜ້ນ-ເຂັ້ມແຂງ.

          ໃນວັນທີ 28-29 ສິງຫາ 2023 ຄະນະໂຄສະນາອົບຮົມເມືອງປາກກະດິງ ໄດ້ເປີດຊຸດອົບຮົມວຽກງານການເມືອງ-ແນວຄິດ ແລະ ສັງລວມ-ຫາງສຽງສັງຄົມຂຶ້ນ ໂດຍການເປັນປະທານຂອງ ທ່ານ ພູເຂົາເງິນ ອິນທະວົງ ກໍາມະການພັກແຂວງ, ເລຂາພັກເມືອງ, ເຈົ້າເມືອງປາກກະດິງ, ເປັນກຽດເຂົ້າຮ່ວມຂອງທ່ານ ອຸດອນ ສອນສຸລິນ ກໍາມະການພັກແຂວງ, ຫົວໜ້າຄະນະໂຄສະນາອົບຮົມແຂວງ. ມີຄະນະຮັບຜິດຊອບວຽກງານການເມືອງ-ແນວຄິດ ແລະ ຕິດຕາມ, ເກັບກໍາສະພາບແນວຄິດ-ຫາງສຽງສັງຄົມຂັ້ນເມືອງ  ແລະ ບ້ ານ ເຂົ້າຮ່ວມ 53 ທ່ານ, ຍິງ 09 ທ່ານ; ຊຸດອົບຮົມດັ່ງກ່າວ ໄດ້ເຜີຍແຜ່-ເຊື່ອມຊຶມບັນດານິຕິກໍາທີ່ກ່ຽວຂ້ອງ ແລະ ບົດຮຽນ 04 ບົດ ຄື:

-   ຄໍາສັ່ງຂອງຄະນະເລຂາທິການສູນກາງພັກ ເລກທີ 04/ຄລສພ, ລົງວັນທີ 10 ກໍລະກົດ 2017 ວ່າດ້ວຍການເພີ່ມທະວີວຽກງານຕິດຕາມ, ເກັບກໍາສະພາບແນວຄິດ-ຫາງສຽງສັງຄົມໃນໄລຍະໃໝ່.

-   ຄຳແນະນໍາຂອງຄະນະໂຄສະນາອົບຮົມສູນກາງພັກ ສະບັບເລກທີ 08/ຄອສພ, ລົງວັນທີ 31 ກໍລະກົດ 2017 ກ່ຽວກັບການຈັດຕັ້ງປະຕິບັດຄໍາສັ່ງຂອງຄະນະເລຂາທິການສູນກາງພັກ ເລກທີ 04/ຄລສພ.

         ບົດຮຽນທີ 01: ບັນຫາພື້ນຖານກ່ຽວກັບວຽກງານຫາງສຽງສັງຄົມ.

ບົດຮຽນທີ 02: ວິທີການເກັບກຳ ແລະ ນໍາໃຊ້ຫາງສຽງສັງຄົມເຂົ້າໃນວຽກງານການເມືອງ-ແນວຄິດ.

ບົດຮຽນທີ 03: ຕາໜ່າງເພື່ອນຮ່ວມງານ.

ບົດຮຽນທີ 04 ວຽກງານຄົ້ນຄວ້າ-ສັງລວມ.

ໃນຕອນທ້າຍຂອງຊຸດອົບຮົມ ຍັງໄດ້ຮັບກຽດຟັງການໂອ້ລົມຂອງ ທ່ານ ອຸດອນ ສອນສຸລິນ ກໍາມະການພັກແຂວງ, ຫົວໜ້າຄະນະໂຄສະນາອົບຮົມແຂວງ ເຊິ່ງທ່ານໄດ້ຊີ້ໃຫ້ເຫັນເຖິງຄວາມສໍາຄັນຂອງວຽກງານດັ່ງກ່າວ ແມ່ນວຽກງານທີ່ຈໍາເປັນ ຕໍ່ບົດບາດການນໍາພາ-ຊີ້ນໍາຂອງພັກ, ເຊິ່ງທ່ານໄດ້ຮຽກຮ້ອງໃຫ້ການນໍາຂອງເມືອງ ພ້ອມດ້ວຍ ຄະນະຮັບຜິດຊອບຂັ້ນເມືອງ ໃຫ້ເອົາໃຈໃສ່ນໍາພາ-ຊີ້ນໍາ, ການຄຸ້ມຄອງຂອງລັດ ແລະ ເພີ່ມທະວີຄວາມຮັບຜິດ ຊອບຂອງຕົນ ເຄື່ອນໄຫວວຽກງານດັ່ງກ່າວ ໃຫ້ມີຄວາມໜັກແໜ້ນ-ເຂັ້ມແຂງ, ເຮັດໃຫ້ບັນດາຫາງສຽງສັງຄົມ ໄດ້ຮັບການແກ້ໄຂທ່ວງທັນສະພາບການ ແລະ ຖືກຕ້ອງ-ສອດຄ່ອງກັບລະບຽບກົດ  ໝາຍ, ເພື່ອໃຫ້ສັງຄົມມີຄວາມສະຫງົບ ແລະ ປະຊາຊົນມີຄວາມເຊື່ອໝັ້ນຕໍ່ການນໍາພາຂອງພັກ-ລັດເຮົາ.