ກອງປະຊຸມວຽກງານໂຄສະນາອົບຮົມ ຂອງພັກ ທົ່ວເມືອງປາກກະດິງ ປະຈໍາປີ 2018 ແລະ ທິດທາງແຜນການ 2019.

ລາຍລະອຽດ

ສ້າງຂື້ນເມື່ອ ວັນອັງຄານ, 23 ເມສາ 2019 02:01

ຂຽນໂດຍ ຄອຂ ບໍລິຄຳໄຊ

ກອງປະຊຸມວຽກງານໂຄສະນາອົບຮົມ ຂອງພັກ ທົ່ວເມືອງປາກກະດິງ ປະຈໍາປີ 2018.

           ເພື່ອຍົກສູງຄຸນນະພາບວຽກງານໂຄສະນາອົບຮົມຂອງພັກ ແລະ ຕີລາຄາຄືນການຈັດຕັ້ງປະຕິບັດ ວຽກງານໂຄສະນາອົບຮົມ ທົ່ວເມືອງປາກກະດິງ ໃນການປະຕິບັດພາລະບົດບາດການເປັນເສນາທິການດ້ານວຽກການເມືອງ-ແນວຄິດ ໃຫ້ແກ່ຄະນະປະຈໍາພັກເມືອງປາກກະດິງ.      

ປະທານຂອງທ່ານ ສົມພອນ ຈັນທະນາສຸກ ກໍາມະການພັກແຂວງ ເລຂາພັກເມືອງ ເຈົ້າເມືອງປາກກະດິງ ແລະ ທ່ານ ພູວົງ ພາສິດທິເດດ ຫົວໜ້າຄະນະໂຄສະນາອົບຮົມເມືອງປາກກະດິງ.

       ກອງປະຊຸມຄັ້ງນີ້ໄດ້ຮັບກຽດເຂົ້າຮ່ວມຂອງທ່ານ ຄູຫວ່າງ ກ່າຊໍ່ຈົ່ງຊົວ ຮອງເລຂາໜ່ວຍພັກ, ຮອງຫົວໜ້າຄະນະໂຄສະນາອົບຮົມແຂວງ, ມີບັນດາຄະນະປະຈໍາພັກເມືອງ, ກໍາມະການພັກເມືອງ, ບັນດາຫົວໜ້າຫ້ອງການທົ່ວເມືອງ ເຂົ້າຮ່ວມຢ່າງພ້ອມພຽງ.

ກອງປະຊຸມໄດ້ຮັບຟັງຜົນສໍາເລັດໃນການຈັດຕັ້ງປະຕິບັດວຽກໂຄສະນາ-ອົບຮົມ ທົ່ວເມືອງ ໃນ 01 ປີ ຜ່ານມາ ແລະ ທິດທາງແຜນການ ປີ 2019 ຕໍ່ໜ້າ.

            ຈາກນັ້ນ, ກອງປະຊຸມໄດ້ຮັບຟັງການປະກອບຄໍາເຫັນ ຈາກບັນດາຜູ້ແທນ ກ່ຽວກັບການຈັດຕັ້ງປະຕິບັດວຽກງານການເມືອງ-ແນວຄິດ ຢູ່ເມືອງປາກກະດິງ ໃນໄລຍະຜ່ານມາ ໂດຍສະເພາະດ້ານດີ, ດ້ານອ່ອນ ແລະ ຂໍ້ຄົງຄ້າງ ທີ່ຈະຕ້ອງໄດ້ເສີມຂະຫຍາຍ ແລະ ປັບປຸງແກ້ໄຂໃນຕໍ່ໜ້າ.

            ໃນຕອນທ້າຍ ທ່ານ ສົມພອນ ຈັນທະນາສຸກ ໄດ້ມີຄໍາຄິດເຫັນ ຊີ້ນໍາຕໍ່ວຽກງານໂຄສະນາອົບຮົມ ພາຍໃນເມືອງປາກກະດິງ ໂດຍທ່ານໄດ້ເນັ້ນໜັກຄວາມສໍາຄັນຂອງວຽກງານການເມືອງ-ແນວຄິດ, ຕໍ່ຄະນະພັກແຕ່ລະຂັ້ນ, ແຕ່ລະພາກສ່ວນ ຕ້ອງໄດ້ເພີ່ມທະວີຄວາມເອົາໃຈໃສ່ໃຫ້ຄວາມສໍາຄັນຕໍ່ການເຄື່ອນໄຫວວຽກງານດັ່ງກ່າວ ແນໃສ່ເຮັດໃຫ້ວຽກງານການເມືອງ-ແນວຄິດ ຢູ່ຂັ້ນຮາກຖານທ້ອງຖີ່ນມີຜົນສໍາເລັດທາງດ້ານປະລິມານ ແລະ ຄຸນນະພາບສູງຂຶ້ນ.

ກອງປະຊຸມໄດ້ດໍາເນີນໄປເປັນເວລາເຄິ່ງວັນ ແລະ ອັດລົງໃນຕອນບ່າຍຂອງວັນດຽວກັນ ດ້ວຍຜົນສໍາເລັດອັນດີງາມ.

• < ຕໍ່ໄປ
• ຕໍ່ໄປ >